பட்டுக்கோட்டை அருகே வீட்டின் ஓட்டை பிரித்து 10 பவுன் நகை திருட்டு

ஏப்ரல்:11-பட்டுக்கோட்டையை அடுத்த ஆத்திக்கோட்டை கீழத்தெருவை சேர்ந்தவர் அய்யாக்கண்ணு (வயது60). விவசாயி. இவரது மனைவி தனலட்சுமி. இவர்கள் 2 பேரும் நேற்றுமுன்தினம் காலை வயலுக்கு சென்றுவிட்டு இரவு 7 மணிக்கு வீடு திரும்பினர். அப்போது வீடு திறந்து இருப்பதை கண்டு அதிர்ச்சி அடைந்து உள்ளே சென்று அவர்கள் பார்த்தனர். அங்கு பீரோ திறந்து கிடந்தது. அதில் இருந்த 10 பவுன் நகைகள் திருட்டு போனது கண்டு அதிர்ச்சி அடைந்தனர். யாரோ மர்ம ஆசாமிகள் வீட்டின் ஓட்டை பிரித்து உள்ளே இறங்கி நகைகளை திருடியது தெரியவந்தது.இதுபற்றி தாலுகா போலீசில் அய்யாக்கண்ணு புகார் செய்தார். அதன்பேரில் பட்டுக்கோட்டை போலீஸ் இன்ஸ்பெக்டர் ஜெகதீஸ்வரன் மற்றும் போலீசார் சம்பவ இடத்திற்கு விரைந்து சென்று பார்வையிட்டனர். இதுகுறித்து போலீசார் வழக்குப்பதிவு செய்து மர்ம ஆசாமிகளை வலைவீசி தேடி வருகின்றனர். மேலும் தஞ்சையிலிருந்து தடயவியல் நிபுணர்கள் வந்து கைரேகைகளை பதிவு செய்தனர்.

பேராவூரணி அருகே வேன் மோதி மாணவன் பலி

ஏப்ரல்:09-பேராவூரணி அருகே உள்ள மருதங்காவயல் கிராமத்தை சேர்ந்தவர் செபஸ்தியான். இவருடைய மகன் அர்னால்டுஜான்சன் (வயது9). இவர் அங்குள்ள ஊராட்சி ஒன்றிய தொடக்கப்பள்ளியில் 4–ம் வகுப்பு படித்து வந்தான். இந்தநிலையில் உடல்நிலை சரியில்லாததால் அர்னால்டு ஜான்சனை ஆஸ்பத்திரிக்கு அழைத்து செல்ல செபஸ்தியான் மகனுடன் கிழக்கு கடற்கரை சாலையில் உள்ள சின்ன ஆவுடையார் கோவில் என்ற இடத்தில் அமைந்துள்ள நிழற்குடை அருகே காத்திருந்தார். அப்போது அந்த ரோட்டில் நாகப்பட்டினத்திலிருந்து மல்லிப்பட்டினம் நோக்கி சென்று கொண்டிருந்த வேன் நிலை தடுமாறி பஸ்சுக்கு காத்திருந்த அர்னால்டுஜான்சன் மீது மோதியது. இதில் படுகாயமடைந்த அவனை அதிராம்பட்டினம் அரசு மருத்துவமனைக்கு கொண்டு சென்றனர். ஆனால் வழியிலேயே அர்னால்டுஜான்சன் பரிதாபமாக இறந்தான். இது குறித்து சேதுபாவாசத்திரம் போலீஸ் இன்ஸ்பெக்டர் செந்தில்குமார் வழக்குப்பதிவு செய்து நாகப்பட்டினத்தை சேர்ந்த வேன்டிரைவர் பாலசுப்பிரமணியனை கைது செய்து விசாரணை நடத்தி வருகிறார்

ஞானபீட விருது பெற்ற பிரபல எழுத்தாளர் மரணம்

ஏப்ரல்:09-பிரபல தமிழ் எழுத்தாளர்களில் ஒருவரான ஜெயகாந்தன், சென்னை கே.கே. நகர் நாகாத்தம்மன் கோவில் தெருவில் குடும்பத்துடன் வசித்து வந்தார். அவருக்கு வயது 80. கடந்த சில மாதங்களாக உடல் நலம் பாதிக்கப்பட்டிருந்த அவர், சில நாட்களுக்கு முன்னர் சிறுநீரக பாதிப்பால் சென்னையில் உள்ள தனியார் மருத்துவமனை ஒன்றில் சிகிச்சைக்காக சேர்க்கப்பட்டிருந்தார். பின்னர் சிகிச்சை முடிந்து வீடு திரும்பினார்.இந்த நிலையில், நேற்று இரவு எழுத்தாளர் ஜெயகாந்தன் மரணம் அடைந்தார். இந்திய அரசின் இலக்கியத்திற்கான உயர்ந்த விருதான ஞான பீட விருதை பெற்ற 2–வது தமிழ் எழுத்தாளர் என்ற சிறப்பை பெற்றவர். சிறுகதைகள், புதினங்கள், கட்டுரைகள், திரைப்படங்கள் என பலவற்றில் கால் பதித்தவர்.1934–ம் ஆண்டு கடலூரில் வேளாண் குடும்பத்தில் பிறந்த இவர், பள்ளிப்படிப்பில் நாட்டம் இல்லாமல் 5–ம் வகுப்புடன் தனது படிப்பை முடித்துக்கொண்டார். பின்னர், விழுப்புரத்தில் மாமா வீட்டில் வளர்ந்த அவர், சென்னைக்கு குடிபெயர்ந்தார்.சென்னை ஜனசக்தி அலுவலக அச்சகத்தில் பணிபுரிந்த அவர், 1949–ம் ஆண்டு தஞ்சையில் காலணி கடையில் வேலை பார்த்தார். அப்போது, காமராஜரின் தீவிர தொண்டராக மாறி, தமிழ்நாடு காங்கிரஸ் கட்சியில் சேர்ந்தார்.சமூக நலனில் அக்கறையும், இலக்கியத்தில் மிகுந்த ஈடுபாடும் கொண்ட ஜெயகாந்தன் ‘வாழ்க்கை அழைக்கிறது’, ‘கைவிலங்கு’, ‘யாருக்காக அழுதான்?’, ‘சில நேரங்களில் சில மனிதர்கள்’, ‘கங்கை எங்கே போகிறாள்?’ உள்ளிட்ட பல நாவல்களையும், ஏராளமான சிறுகதைகளையும் எழுதி இருக்கிறார்.‘சில நேரங்களில் சில மனிதர்கள்’ அவரது சிறந்த நாவல்களில் ஒன்றாகும். இந்த நாவலும், ‘உன்னைப்போல் ஒருவன்’ நாவலும் திரைப்படமாக வெளிவந்தன. இதில், ‘உன்னைப்போல் ஒருவன்’ சிறந்த மாநில மொழித் திரைப்படத்திற்கான ஜனாதிபதி விருதை பெற்றது என்பது குறிப்பிடத்தக்கது. பத்ம பூஷண் விருது, சாகித்ய அகாடமி விருதையும் அவர் பெற்றுள்ளார்.

பாகிஸ்தானுக்கு ரூ.6,200 கோடி ஆயுத சப்ளை

ஏப்ரல்:09-தீவிரவாத ஒழிப்பு என்ற பெயரில் பாகிஸ்தான் ஆயுதங்களையும், போர்த்தளவாடங்களையும் குவித்து வைப்பதில் ஆர்வம் காட்டி வருகிறது.இந்த நிலையில், 100 கோடி டாலர் (சுமார் ரூ.6,200 கோடி) மதிப்பிலான ஆயுதங்கள், போர்த்தளவாடங்கள் சப்ளை செய்ய வேண்டும் என்று கடந்த ஆண்டு அமெரிக்காவிடம் பாகிஸ்தான் கேட்டுக்கொண்டது.பாகிஸ்தான் கேட்ட ஆயுதங்கள், தளவாடங்களின் பட்டியலில் முக்கியமாக, 15 ‘ஏஎச்–1 இசட் வைபர்’ தாக்குதல் ஹெலிகாப்டர்கள், 32 ‘டி–700 ஜிஇ 401 சி’ என்ஜின்கள், 1000 ‘ஏஜிஎம்–114 ஆர் ஹெல்பயர் 2’ ஏவுகணைகள், 36 ‘எச்–1’ தொழில்நுட்ப புதுப்பிப்பு பணி கம்ப்யூட்டர்கள், 17 ‘ஏஎன்/ஏஏகியூ–30’ இலக்கு பார்வை சாதனங்கள் மற்றும் பல இடம்பெற்றுள்ளன.கணினி சார்ந்த ஏராளமான தளவாடங்களை சப்ளை செய்யுமாறும் அமெரிக்காவிடம் பாகிஸ்தான் கேட்டுக்கொண்டிருந்தது.இந்த நிலையில், பாகிஸ்தானுக்கு 100 கோடி டாலர் மதிப்பிலான இந்த ஆயுதங்களையும், தளவாடங்களையும் சப்ளை செய்வதற்கு அமெரிக்க வெளியுறவுத்துறை ஒப்புதல் வழங்கி உள்ளது. இது தொடர்பாக அமெரிக்க பாராளுமன்றத்தில் அது அறிக்கையும் அளித்துள்ளது.‘‘பாகிஸ்தான் நவீன ஆயுதங்களை வாங்கிக் குவிப்பதில், பல நூறு கோடி டாலர்களை பாகிஸ்தான் வீணாக்கி வருகிறது. அதை அந்த நாட்டின் சுகாதாரம், கல்வி, வேலை வாய்ப்பினை உருவாக்குவதற்கு பயன்படுத்த முடியும்’’ என அமெரிக்காவின் ‘நியூயார்க் டைம்ஸ்’ பத்திரிகை தலையங்க கட்டுரை வெளியிட்ட சுவடு மறைவதற்கு முன்பாக பாகிஸ்தானுக்கு அதே அமெரிக்கா ரூ.6,200 கோடி மதிப்பிலான ஆயுதங்களையும், போர்த்தளவாடங்களையும் விற்பனை செய்ய முன் வந்திருப்பது குறிப்பிடத்தக்கது.

கூடுதல் பயணிகளுக்கு சவுதி அரசு மறுப்பு

ஏப்ரல்:08-ஹஜ்’ பயணத்துக்காக உலகில் உள்ள லட்சக்கணக்கான முஸ்லிம்கள் சவுதி அரேபியா நாட்டுக்கு செல்கின்றனர். அந்தவகையில் இந்தியாவில் இருந்து எத்தனை பேர் வரவேண்டும் என்று அறிவித்த பின்னர், இந்திய வெளியுறவுத்துறை அமைச்சகமும், மும்பையில் உள்ள அகில இந்திய ஹஜ் கமிட்டியும் சேர்ந்து மாநில வாரியாக பிரித்து அனுப்புகிறது.கடந்த 2013–ம் ஆண்டு 1 லட்சத்து 70 ஆயிரத்து 25 பேர் சென்றுள்ளனர். இந்த எண்ணிக்கை கடந்த ஆண்டு 1 லட்சத்து 36 ஆயிரமாக குறைக்கப்பட்டது. ஆனால் இந்த ஆண்டு ‘ஹஜ்’ பயணிகளின் விருப்பப்படி 1 லட்சத்து 41 ஆயிரத்து 790 பேர் என்ற எண்ணிக்கையில் அனுமதிக்க வேண்டும் என்று மத்திய அரசு சவுதி அரேபியா அரசுக்கு கோரிக்கை விடுத்தது.ஆனால் சவுதி அரேபியா அரசு இதனை ஏற்கவில்லை. கடந்த ஆண்டை போல் 1 லட்சத்து 36 ஆயிரம் பேர் மட்டுமே வரமுடியும் என்று திட்டவட்டமாக கூறிவிட்டது.இந்தியாவில் இருந்து ‘ஹஜ்’ பயணம் செல்வதற்கு முன்பாக சவுதி அரேபியா நாடு பயணிகளின் எண்ணிக்கையில் சில கட்டுப்பாடுகளை விதித்துள்ளது. குறிப்பாக ஆயிரம் முஸ்லிம்களுக்கு ஒருவர் என்ற விதியை கடைப்பிடித்து வந்தது. ஆனால் தற்போது ‘மெக்கா’ பள்ளிவாசல் விரிவாக்கத்துக்காக கட்டிடங்கள் கட்டப்பட்டு வருகிறது.இந்தப்பணி 2020–ம் ஆண்டு வரை நடக்கிறது. கட்டுமானத்திற்கு இடையூறு ஏற்படாமல் இருப்பதற்காக வெளிநாடுகளில் இருந்து வரும் பயணிகளில் எண்ணிக்கையை 2020–ம் ஆண்டு வரை 20 சதவீதம் குறைத்துள்ளது. அன்படி இந்தியாவில் இருந்து செல்பவர்களில் 34 ஆயிரம் பேர் குறைக்கப்பட்டு உள்ளனர். தற்போது ‘ஹஜ்’ காலங்களில் 30 லட்சம் பேர் இருக்கின்றனர். இந்த எண்ணிக்கையை 2020–ம் ஆண்டு 1 கோடியாக உயர்த்த சவுதிஅரேபியா நாடு முடிவெடுத்துள்ளது.நடப்பாண்டு இந்தியாவில் இருந்து 1 லட்சத்து 36 ஆயிரம் பேர் செல்ல உள்ளனர். இதில் அரசு சார்பில் 1 லட்சத்து 5 ஆயிரம் பேரும், டிராவல்ஸ் நிறுவனங்கள் சார்பில் 31 ஆயிரம் உட்பட 1 லட்சத்து 36 ஆயிரம் பேர் செல்கின்றனர். இதில் தமிழகத்தில் இருந்து 2 ஆயிரத்து 660 பேர் செல்ல உள்ளனர். இவர்களில் ஆண்கள், பெண்கள் எண்ணிக்கை இன்னும் அறிவிக்கப்படவில்லை. இந்தியாவில் இருந்து முதல் விமானம் ஆகஸ்டு 17–ந்தேதி புறப்படுகிறது.300 பயணிகளுக்கு சேவை செய்வதற்காக 1 தொண்டர் மூலம் 2 ஆயிரத்து 660 பேருக்கு 9 தொண்டர்கள் பயணிகளுடன் சென்று அவர்களுக்கு தேவையான உதவிகளை செய்கின்றனர். இந்த தொண்டர்களுக்கான செலவை ரூ.18 லட்சத்தை அரசு ஏற்கிறது என்று தமிழ்நாடு ‘ஹஜ்’ சர்வீஸ் சொசைட்டி வட்டாரங்கள் தெரிவித்தன.

திருச்சி விமானநிலையத்திற்கு விருது

திருச்சி, : அதிக பயணிகளை ஏற்றிச் செல்வதில் முதலிடம் பெற்ற திருச்சி விமான நிலையத்திற்கு விருது வழங்கப்பட்டது. டெல்லியில் நடந்த விழாவில் மத்திய அமைச்சர் கஜபதிராஜ் விருதை வழங்கினார். திருச்சி விமான நிலைய இயக்குனர் நெஹி நிருபர்களுக்கு அளித்த பேட்டி: கடந்த வருடத்தில் அதிக பயணிகளை ஏற்றிச் செல்லகூடிய விமான நிலையங்களுக்கு விருது வழங்க, ஏர்போர்ட் அத்தாரிட்டி ஆப் இந்தியா (ஏஏஐ) முடிவு செய்தது. இதன்படி, சர்வதேச 60 விமான நிலையங்களுக்கு மொத்தம் 5 மதிப்பெண்கள் நிர்ணயிக்கப்பட்டன.  

இதில் திருச்சி விமானநிலையம் 4.7 மதிப்பெண்கள் பெற்று முதலிடத்தை பெற்றது. சண்டிகர் விமான நிலையம் 4.69 மதிப்பெண் 2வது இடத்தையும், 4.68 மதிப்பெண்கள் பெற்று புவனேஸ்வர் விமான நிலையம் மூன்றாவது இடத்தையும் பிடித்தன. கடந்த சில நாட்களுக்கு முன் மத்திய விமான போக்குவரத்துறை அமைச்சர் கஜபதிராஜ் இதற்கான விருதுகளை டெல்லியில் வழங்கினார்.  மேலும் திருச்சி விமான நிலையத்தில் உள்ள பூங்காவை பராமரிப்பதற்கான பணி தனியாரிடம் அளிக்கப்படவுள்ளது. சர்வதேச தரத்திலான கேண்டீன் அமைக்கவும் நடவடிக்கை மேற்கொள்ளப்படவுள்ளது. இவ்வாறு நெஹி தெரிவித்தார்.

இந்திய கடற்படையின் நடவடிக்கையை கண்டு உலகநாடுகள் வியப்பு

ஏப்ரல்:07-ஏமனில் அரசுக்கு எதிராக போராடி வரும் ஹவுத்தி கிளர்ச்சியாளர்களை ஒடுக்க, சவுதி அரேபியா தலைமையில் அரபு நாடுகள் வான்வழி தாக்குதலை தீவிரப்படுத்தி வருகின்றன. அங்கு இந்தியா உள்பட பல்வேறு வெளிநாட்டினர் சிக்கி தவித்து வருகின்றனர். எனவே அவர்களை பத்திரமாக மீட்கும் பணிகளில் அந்தந்த நாட்டு பாதுகாப்பு படையினர் ஈடுபட்டு வருகின்றனர்.உள்நாட்டுப்போரால் பாதிக்கப்பட்டு உள்ள ஏமனில் சிக்கியிருக்கும் இந்தியர்களை மீட்க மத்திய அரசும் தீவிர நடவடிக்கையில் இறங்கி உள்ளது. ‘ஆபரேசன் ரஹத்’ என்று பெயரில் இந்திய பாதுகாப்பு படையினரால் மேற்கொள்ளப்பட்டு வரும் இந்த மீட்பு நடவடிக்கை கடந்த 30-ஆம் தேதி முதல் மும்முரமாக நடந்து வருகிறது. இதற்காக ஐ.என்.எஸ். போர்க்கப்பல் ஏடன் துறைமுகத்துக்கு அருகே கடலில் நங்கூரமிட்டு நிறுத்தப்பட்டு உள்ளது. அங்கு தீவிரமாக போர் நடந்து வருவதால், துறைமுகத்துக்குள் செல்ல கப்பலுக்கு அனுமதி கிடைக்கவில்லை.இதனால் ஏமனின் பல்வேறு பகுதிகளில் இருந்து மீட்கப்படும் இந்தியர்கள் படகுகள் மற்றும் சிறிய ரக விமானங்கள் மூலம், துறைமுகத்தில் இருந்து சுமார் 6 கி.மீ. தூரத்தில் நிறுத்தப்பட்டிருக்கும் இந்த கப்பலுக்கு அழைத்துச் செல்லப்படுகிறார்கள். பின்னர் அந்த கப்பலில் ஜிபோட்டி நாட்டுக்கு அழைத்துச் செல்லப்படுகிறார்கள். அதன்பிறகு அங்கிருந்து விமானப்படை விமானங்கள் மூலம் மும்பை, கொச்சி போன்ற நகரங்களுக்கு அழைத்து வரப்படுகின்றனர். நேற்று மட்டும் 1000-த்திற்கும் அதிகமான இந்தியர்கள் மீட்கப்பட்டனர். இதுவரையில் கடல் வழி மற்றும் வான்வழியாக 3,300 இந்தியர்கள் வரையில் மீட்கப்பட்டு உள்ளனர் என்று தெரிவிக்கப்பட்டு உள்ளது. சுமார் 4 ஆயிரம் இந்தியர்கள் ஏமன் நாட்டில் இருப்பதாக கணிக்கப்பட்டுள்ளது. அவர்களில் பெரும்பாலானவர்கள் கேரள மாநிலத்தை சேர்ந்தவர்கள். மேலும் இந்தியர்களை மீட்கும் போது, அவர்களுடன் பணியாற்றும் வெளிநாட்டினரையும் மனிதாபிமான அடிப்படையில் இந்திய அதிகாரிகள் மீட்டு வருகின்றனர். அதன்படி வங்காளதேசம், நேபாளம், பாகிஸ்தான், உகாண்டா உள்ளிட்ட பல்வேறு நாடுகளை சேர்ந்த 200க்கு அதிகமான பேரையும் இந்திய அதிகாரிகள் மீட்டனர்.இந்நிலையில் ஏமனில் சிக்கிய இந்தியர்களை மீட்கும் பணியில் இந்திய கடற்படையின் நடவடிக்கையை கண்டு உலகநாடுகள் வியந்து உள்ளன. 26 நாடுகள் தங்கள் நாட்டவர்களையும் ஏமனில் இருந்து மீட்பதற்கு உதவிசெய்ய வேண்டும் என்று இந்தியாவிற்கு கோரிக்கை விடுத்து உள்ளன. இதற்கிடையே ஏமனில் சிக்கி தவிக்கும் தங்கள் நாட்டவர்களை மீட்பதற்கு உதவி செய்ய வேண்டும் என்று 26 நாடுகள் இந்தியாவிற்கு கோரிக்கை விடுத்து உள்ளது. பக்ரைன், வங்காளதேசம், கியூபா, செக் குடியரசு, எகிப்து, ஜிபோட்டி, பிரான்ஸ், ஜெர்மனி, ஹங்காரி, ஈராக், இந்தோனேசியா, அயர்லாந்து, லெபனான், மலேசியா, மாலத்தீவு, நேபாளம், நெதர்லாந்து, பிலிப்பைன்ஸ், ருமேனியா, சுலவேனியா, இலங்கை, சிங்கப்பூர், சுவேடன், தாய்லாந்து, துருக்கி மற்றும் அமெரிக்கா கோரிக்கை விடுத்து உள்ளது என்று சையது அக்பரூதீன் டுவிட்டரில் செய்தி வெளியிட்டு உள்ளார்.